Hurgumo.

 Maanso Hurgumo

Ha iska heeso ruuxii

Halasaha jacayl qaba

Ha hiqleeyo ruuxii

Lagu hayo meel daran

Hana qoro awaal tiris

Ha u dhigo siday tahay

Ha u dhowro caashaqa

Intaa hadhay ee badan

War la hayo sidiisaba

Kama hadho wax sii jira

Wax la hubo siday tahay

Qof u sheegay muu hadhin

Anna hannashadaydii

Hanaan qurux ilwaadkii

Inkastooy haldoor tahay

Waxba yay haboonaan

Naftan hiiftaybaa tidhi

Hogashii daroortaay

Iska hayso dhibicii

Ha ii di in habeen qudha

Hami diidayaa yidhi

Haaneedkii irmaanaa

Yuu buuxin hadhuubada

Dib u hayso godolkii

Damiir hoogaybaa yidhi

Heemaalkii I jiitow

Ha soo marin halkiiyoo

Dib ha u hilaac badan

Hankan quustaybaa yidhi

Hibaaqii widhwidhayow

Igadaa halaalaca

Kuma hayo wax xiisee

Hilib qoomanbaa yidhi

Ha ka tagi wax ii mudan

Humaagii wacnaayow

Ha ii goc sidaadaba

Qalbi holcayabaa yidhi

Afartaa hurgumahaygiyo

Halistaan dhex jiifiyo

Hasaawe badan tii

Igu heshay aduunyada

Libin hoogtay ku asqee

Hadii aan huray maanka

Oo kuu saaray hadayda

Hoy kaaga dhigay qaali

Oo marin habowgayga

Hilin kaaga soo qaaday

Ma inaad i halakayso

Habratood i jiidhjiidho

May kula haboonaatay

Mise way kula a haatay

Waxaad ii haboonaato

Sow  hiilba kaa waayay

Maxaan kaa hor joogi

Maan kaa haybaysan

Intaan kuu heesaayay

Adna kibr hiftaa haysay

Ana qubtay howraartaydu

Waxa ii hadhayba waa qiiro

La hoyatay farxad oo dhan

Qosol kuma hagaagaayo

Wax hagaagay mana sheegto

Haday hadhay duniyoo dhan

Hibashana ma daynaayo

Ma helay ma quus gayso

Naftaad heertay ee hoysay

Halna way i seegtee

Hadhaageedu ba anaa

Heegayahay daroortaa

Ma ka samir haldhabaa

Heemaalyahay i jiitaa

Ma hiqlee darteedbaa