Tiriig

 MAANSADA TIRIIG HALDHAA 2014

Inaa tahay tiriig baxay

Goortaan tilmaansaday

 Nolol taabi kari waa

Xalna toosin kari waa

Caashaqaagu taagiyo 

 Taaluu is saaroo

Naf tacaasha mooyee

 Hali waa tusaalana

Timir geed ku taaliyo

Sida tahay tufaaxbaan

Kugu taamayaayoo

Qalbigaad ku taalaa

Markii aan ku tacajabay

Wajigaaga tooshka ah

Nuurka  tuuraaya

Dabnahaaga tukhulka ah

Hadal wada tiraaboo

Tixi ay ku ladhan tahay

Sunayaasha talmoonee

Lagu tawaaday qalinkiyo

Timahaaga dheeree

Ka daandagay tararada

Qoorteeda takhankiyo

Lagu taxay siliskiyo

Lafayahaya talaabada

Xaragadu  ku taalliyo

Horaadaan kala tagin

Dhexda taako qabadka ah

Waxa aan ku tilaamaba

Garan waa tiriigeey

Tafiirtii suleekhoo

Qurux loo tabiyaay

Xuralcayn ka timid

 Togogii janadaay

Tuska roob hilaacoo

Dhulka tiix ku maydhaay

Dhirta oo tarantoo

Tabinaysa ubaxaay

Gobta dumar u talisiyo

Tusmadii kalgacalkaay

 Taashkii bureeqoo

Loo wada tartamayaay

Mida looga tagayeey

Bilic laga tafniidaay

Mida loogu tumayee

Tusmo loogu heesaay

Mida xubi talaashee

U tabisay dhiigaay

Mida la igu toogteen

Tabantaabinaayaay

Yarta la ii tigtigee

La ii tabcinayaay

Yarta aan u tooseen

hurdada u tawalaay

Yartan towsta aan qabo

Igu sheegtay tixa haay

Yartan waayahay togan

Uga tagay haweenkaay

Nin  tabtaan ahee garo

Jacayl tooxee bal maqal

Todobaatan jeerbaan

Kugu sheegay tuducyoo

Muxibada taqsiimee

Ma ii taahi doontaa

Taariikhda caashaqa

Ma ku dari tacliintoo

Ma turxaami doontaa

La aantay tabaalaha

Ma I tabi kolaan tago

Taysareey malabeey

Taakulo jacayleey

Tamartii naftaydaay

Midaan tiigsanaayaay

Teegaaro mug wayneey

Tabantaabo dheereey

Ruux tacab loo huraay

Tayadii noloshaay

Caashaqu waa tuhune

Intaanu ii tar sheegan

 Ayaheena ka taliyoo

Ila tusmee reeroo

Taran aynu beernee

Ha tisqaado jacaylkuye

Todobaatan dumaraan

Adi kaa tilmaansadee

Kaaga taxandoodoon

Anfac kaaga tuugmee

Turugsiga haweenkana

Ha ii tag xumanine

Towstiyo xanuunkiyo

Tawaawaca iga saaroo

Tookha iga daayoo

Iga dhowr tiraanyada

Caashaqeena tiriigeey

Maruun taabo galiyoo

Tiiciyo walaacana

Tolonaha u fidiyoo

Ila tuuji wacadkoo

Waa taar noloshiyoo

Qoraal ku taagane

Intaad teerigiyo

Ka dhicin taag dheer

Turuqyada ka jabin

Nin kaleeto kula tagin

Anna aan tabaalaha

Jacaylkaa tasoobuun

Uga tagin aduunyada

Taladaydan dhowroo

Ila tuuji caashaqa

Ma tiraabi karayee

Ma turxaami karayee

Nolosheena taran tari

Ha dhigin badh kuma taal